Chris Pratt Star-Lord MCUga qaytishini tasdiqladi

Aktyor Chris Pratt «Galaktika qo'riqchilari» qahramoni Star-Lord Marvel kinoolamiga albatta qaytishini aytdi. Uning so'zlariga ko'ra, buning uchun studiya allaqachon aniq qadamlar tashlagan.

Pratt buni The Playlist'ning «Bingeworthy» podkastida Star-Lord qaytishi haqida gapirib, tasdiqladi. Aktyor Marvel Studios rahbari Kevin Feige va prodyuser Lou D'Esposito bilan yaxshi munosabatda ekanini, va'dani bajarish yuzasidan muloqotlar davom etayotganini hamda bu borada «jiddiy harakatlar» ham qilinganini aytdi.«Star-Lord'ni yana ko'rasizlar, bu juda quvonarli. Lekin qachon ekanini aytishga haqqim yo'q. U hech qayoqqa ketmaydi», — dedi Pratt.

Pratt o'z g'oyasini taklif qilgan

Bu gaplar bir necha oy oldingi suhbatdan keyin aytildi. «Happy Sad Confused» podkastida Pratt Marvel xohlagan har qanday ishni bajarishga tayyorligini, shu bilan birga qahramoni nima qilishi kerakligi haqida o'zining kuchli tasavvuri borligini aytgan edi. U bu g'oyani Feige'ga ham taklif qilganini tasdiqlagan: Marvel kelgusi o'n yillik hikoyalarini rejalashtirayotgani uchun u o'z hissasini qo'shishga tayyor ekan.

Star-Lord yo'li

Pratt Star-Lord rolini olti filmda ijro etgan: «Galaktika qo'riqchilari» (Guardians of the Galaxy), «Galaktika qo'riqchilari. 2-qism» (Guardians of the Galaxy Vol. 2), «Qasoskorlar: Cheksizlik urushi» (Avengers: Infinity War), «Qasoskorlar: Final» (Avengers: Endgame), «Tor: Sevgi va momaqaldiroq» (Thor: Love and Thunder) hamda «Galaktika qo'riqchilari. 3-qism» (Guardians of the Galaxy Vol. 3). Uchinchi qism yakunidagi sahnada Star-Lord qaytishi va'da qilingan edi.

Marvel kinoolamining navbatdagi filmi — «Qasoskorlar: Qiyomat kuni» (Avengers: Doomsday) 18-dekabrda kinoteatrlarda chiqadi. Star-Lord bu filmda ishtirok etadimi, manbada aytilmagan.

Manba: Variety