«Ramayana» Los-Anjelesda premyera qilindi, film 5-noyabrda chiqadi

Nitesh Tiwari rejissyorligidagi «Ramayana» filmining Los-Anjelesdagi premyerasi Kino san'ati va fanlari akademiyasi muzeyidagi David Geffen teatrida o'tdi. Film 2026-yil 5-noyabrda ekranlarga chiqadi.

Bollywood Hungama xabar berishicha, premyerada prodyuser Namit Malhotra so'zga chiqib, tadbirni o'zining «Oskar lahzasi» deb atadi. U bu kechani Akademiya teatrida o'tkazishni ataylab xohlaganini aytdi.

Malhotra Los-Anjelesga 2007-yilda ko'chib o'tganini, Sharq va G'arb kino sanoatini bog'laydigan kompaniya qurishni maqsad qilganini eslab o'tdi. 19 yoshida garajdagi kichik startapdan yo'l boshlaganini, 2008-yilgi inqirozda boyligining 90 foizini yo'qotganini ham aytdi. Uning so'zlariga ko'ra, bugun dunyodagi eng yirik mustaqil prodyuserlik loyihasi — «Ramayana»ni taqdim etayotgani uning uchun tasavvurga sig'maydigan tuyg'u.

Prodyuser vizual effektlar sohasidagi DNEG kompaniyasi bilan hamkorligiga ham to'xtaldi. Uning ta'kidlashicha, kompaniya Kristofer Nolan va Deni Vilnev kabi rejissyorlar bilan ishlagan loyihalari uchun sakkizta «Oskar» yutgan, shundan yettitasi so'nggi 11 yilda qo'lga kiritilgan.

Asosiy ijodkorlar sahnada

Malhotra sahnaga filmning asosiy ijodkorlarini taklif qildi: rejissyor Nitesh Tiwari, Rama rolidagi Ranbir Kapoor va Sita rolini ijro etgan Sai Pallavi. Keyin Ravana rolidagi Yashni «rok yulduz» deb tanishtirdi. U loyihada kompozitor Hans Zimmer va xoreograf Terry Notary kabi xalqaro hamda hind iste'dodlari ishtirok etganini ham alohida ta'kidladi.

Malhotra filmni «Sharq va G'arbning eng yaxshilari» hamkorligi mahsuli, dunyo bo'ylab milliardlab kishi uchun katta ma'no kasb etadigan asar deb ta'rifladi.

Film haqida

«Ramayana»da Ranbir Kapoor Rama, Sai Pallavi Sita, Yash Ravana rolini o'ynaydi. Sunny Deol Hanuman, Ravi Dubey esa Lakshman obrazida ko'rinadi. Film Namit Malhotraning Prime Focus Studios kompaniyasi tomonidan DNEG va Yashning Monster Mind Creations studiyasi bilan hamkorlikda ishlab chiqarilgan.

Loyiha ikki qismdan iborat: birinchi qism 2026-yil 5-noyabrda, ikkinchisi 2027-yilgi Diwali bayramida chiqadi. Film hind, tamil, telugu, kannada va malayalam tillarida namoyish etiladi, xalqaro tarqatishni Sony Pictures amalga oshiradi.

Manba: Bollywood Hungama