«Jumanji: Open World» treyleri chiqdi: Johnson va Black flirt qilmoqda

Sony Pictures franshizaning yangi qismi — «Jumanji: Open World» treylerini e'lon qildi. Film 25-dekabrda ekranlarga chiqadi va trilogiyaning yakuniy qismi sifatida e'lon qilingan.

Treylerda Dwayne Johnson qahramonining o'yin avatariga Wolff o'ynagan qahramonning onasi kirib olgani ko'rsatilgan. Jack Blackning avatarini esa restoranda ishlaydigan erkak egallaydi. Black Johnsonga qarab «Qanday ayol!» deydi, Johnson esa noz bilan «Qo'ysangiz-chi» deb javob beradi.

Filmning markazida o'yin qahramonlari konsoldan chiqib, bizning dunyomizda tartibsizlik keltirib chiqaradi. Dwayne Johnson, Jack Black, Kevin Hart, Karen Gillan va Alex Wolff avvalgi rollarida qaytadi. Aktyorlar tarkibini Nick Jonas, Morgan Turner, Ser'Darius Blain, Madison Iseman va Danny DeVito to'ldiradi.

Franshiza tarixi

Yangi film 2017-yildagi «Jumanji: O'rmonga xush kelibsiz» (Jumanji: Welcome to the Jungle) filmidan keyingi voqealarni davom ettiradi. O'sha film 1995-yilda Robin Williams ishtirokida chiqqan filmdan keyin franshizani qayta boshlab bergan edi. 1995-yildagi film Chris Van Allsburgning 1981-yilda nashr etilgan bolalar kitobi asosida suratga olingan.

«O'rmonga xush kelibsiz» video o'yin ichida kattalar avatarlari qiyofasida qolib ketgan o'smir do'stlar haqida hikoya qiladi. U 2017-yil dekabrida ekranlarga chiqib, butun dunyo bo'yicha 950 million dollardan oshiq tushum yig'di. 2019-yildagi davomi — «Jumanji: Keyingi bosqich» (The Next Level) esa 801 million dollar topdi.

Avvalgi ikki filmni suratga olgan Jake Kasdan «Open World»ni ham o'zi rejissyorlik qilgan. Ssenariyni u Jeff Pinkner va Scott Rosenberg bilan hammualliflikda yozgan. Prodyuserlar — Matt Tolmach, Jake Kasdan, Dwayne Johnson, Dany Garcia va Hiram Garcia.

Manba: The Hollywood Reporter