Gunn: DC Universe kanonidagi birinchi film «Superman» emas, «O'z-o'zini o'ldirish otryadi»

James Gunn 2021-yilda chiqqan «Suicide Squad» filmi DC Universe kanonidagi eng birinchi film ekanini rasman tasdiqladi. Avval bu o'rin David Corenswet ishtirokidagi «Superman» uchun mo'ljallangan edi.

Bu haqda Gunn DC'ning «The Suicide Squad: Is It Canon?» podkastida gapirdi. Podkastni Gunnning o'zi, aktrisa va rafiqasi Jennifer Holland hamda aktyor Steve Agee olib bordi. Bir soatlik suhbatda ular tomoshabinlarning 2021-yilgi film kanonga kiradimi, degan savollariga javob berib, ayrim aktyor va qahramonlarning kelajagi haqida ham gapirishdi. Gunn «The Suicide Squad» ham, «Peacemaker» ning birinchi mavsumi ham dastlab DCEU (DC Extended Universe) tarkibida o'ylanganini tan oldi. Keyin franshiza qayta ishga tushirilgani sabab u hammasini noldan boshladi: avval HBO'ning «Creature Commandos» birinchi mavsumi «ishtahani ochuvchi taom» vazifasini o'tadi, so'ng 2025-yilda Corenswet bilan «Superman» filmi chiqdi.

Gunn boshqa rejissyorlarga ham DC qahramonlari bo'yicha o'z g'oyalarini ilgari surishga imkon berayotganini, ular «Elseworlds» qatorida chiqishini aytdi. Misol sifatida Mat Reeves'ning Batman olamini keltirdi — uni «juda real va qo'pol jinoyat hikoyasi» deb atadi.

«Bitta kichik yulduzcha»

Podkast oxirida Agee va Holland film «kanonmi, yengil kanonmi yoki yulduzchali kanonmi» deb so'rashdi. Holland filmning butunlay kanon bo'lmasligi uchun sabab ko'rmasligini aytdi. Agee esa film hozirgi DCU loyihalarida yetarlicha tilga olinishini, shuning uchun kanon ekanini bildirdi.

Gunn «bitta kichik yulduzcha» borligini aytdi: Harley Quinn'ning kelajagi hali noaniq, shuning uchun tomoshabinlardan bu borada biroz bag'rikenglik kutishini ta'kidladi. Shundan tashqari butun filmni kanon deyish mumkin, dedi u. Rejissyor Threads'da kimdir kanonga to'g'ri kelmaydigan tafsilot topsa, bunday e'tirozlarni qabul qilishini va javob berishga urinishini qo'shimcha qildi; xatolar bo'lishi tabiiy, dedi u.

Gunnning fikricha, «The Suicide Squad» kanonga «Peacemaker» ning birinchi mavsumiga qaraganda ancha oson sig'adi. «Biz nafaqat «The Suicide Squad» kanon deymiz, balki u DCU'dagi birinchi kanonik film», — dedi Gunn.

Manba: Screen Rant