«Spy x Family» 4-mavsumi va yangi to'liq metrajli film 2027-yilda chiqadi

Yaponiyaning Toho studiyasi mashhur «Spy x Family» animesining to'rtinchi mavsumi 2027-yilda qaytishini e'lon qildi. Shu yili franshizaning yangi kinofilmi ham Yaponiya kinoteatrlarida namoyish etiladi.

Variety xabar berishicha, yangilikni nishonlash uchun Toho to'rtinchi mavsumning tizer tasvirini e'lon qildi. Unda Forgerlar oilasi yangi mavsumda birinchi marta yana birga ko'rinadi: Loid, Yor, Anya va it Bond yevropacha uslubdagi shahar ko'chasida sayr qilib ketmoqda, ularning yonidan gazeta varaqlari uchib o'tadi.

Toho serial va film bo'yicha chiqish sanalari, hikoya hamda ishlab chiqarish tafsilotlari keyinroq e'lon qilinishini bildirdi. Yangi film franshizaning kinoteatrlardagi navbatdagi premyerasi bo'ladi.

Franshiza haqida

Anime Endo Tatsuya manga asari asosida suratga olingan. U televideniyeda 2022-yilda ilk bor namoyish etilgan va jangari janr bilan komediyani uyg'unlashtirgani uchun butun dunyo bo'ylab muxlislar orttirgan. Hikoya oddiy hayot ko'rinishini saqlab yurgan, ammo har bir a'zosi o'z sirini yashirgan Forgerlar oilasi haqida.

Markazda — mohir josus Loid Forger. U maxfiy topshiriqni bajarish uchun soxta oila quradi va «Twilight» kod nomi ostida fidoyi er va ota qiyofasiga kiradi: maqsad — nufuzli maktabga kirib, taniqli siyosatchiga yaqinlashish, dunyo tinchligi esa shu topshiriq natijasiga bog'liq.

Biroq Loidning niqobida u bilmagan yoriqlar bor. Rafiqasi Yor yashirincha tajribali qotil, ikki er-xotin esa bir-birining haqiqiy kimligini bilmaydi. Asrab olingan qizi Anya odamlarning fikrini o'qiy oladi va ikkalasining kimligini yaxshi biladi, oilaning iti Bond esa kelajakni ko'ra oladi.

Toho haqida

1932-yilda ttashkil etilgan Toho kino ishlab chiqarish, tarqatish va namoyish etish, jonli teatr, anime hamda shaharsozlik ko'chmas mulki sohalarida faoliyat yuritadi. Kompaniyaning xalqaro miqyosda kengayayotgan anime biznesi Toho Animation brendi ostida ishlaydi — «Mening qahramonlik akademiyam» (My Hero Academia) va «Jujutsu kaisen» (Jujutsu Kaisen) ham shu yerdan chiqqan. Kompaniya filmlari orasida «Godzilla» franshizasi va Kurosava Akiraning «Yetti samuray»i (Seven Samurai) bor.

Ikkala yangi loyiha animening teleefirdagi debyutidan besh yil o'tib, Forgerlarni ekranlarga qaytaradi.

Manba: Variety