Mayk Mayers «Shrek» spinofi «Donkey»da ishtirok etishini istisno qilmadi

Aktyor Mayk Mayers «Shrek» spinofi «Donkey»da ovoz berishi mumkinligini aytdi. U «Austin Powers»ning to'rtinchi qismi ssenariysini ham yozayotganini tasdiqladi.

Mayers The Hollywood Reporter nashriga «Focker-in-Law» premyerasida bergan intervyusida «Shrek» franchayzini beshinchi qismdan keyin ham davom ettirishni istashini bildirdi. Uning so'zlariga ko'ra, bu loyiha juda qiziqarli, yaxshi yozilgan, ijodkorlar esa unga nihoyatda mehribon munosabatda bo'lishadi. Kemeron Dias va Eddi Merfini ham u iliq so'zlar bilan esladi: Diasni «ajoyib», Merfini esa «daho» deb atadi.

Eddi Merfi ovoz beradigan «Donkey» DreamWorks Animation studiyasining alohida filmi bo'lib, uning chiqish sanasi 2028-yil 30-iyun deb belgilangan. Loyiha eshak obrazining kelib chiqish tarixini ochib beruvchi prekvel sifatida tasvirlanmoqda. Shu sababli Shrek bu filmda katta rol o'ynashi ehtimoli past, biroq Mayers qatnashishi mumkinligini inkor etmadi.

«Menimcha, men unda yo'qman. Ehtimol, bordirman. Aniq bilmayman, lekin bu film juda kech keldi», — dedi aktyor. U Donkey'ni o'zining eng sevimli qahramonlaridan biri deb atadi va film nega bundan oldinroq chiqmaganidan hayron ekanini aytdi. Mayersning o'zi premyerada birinchilardan bo'lib tomosha qilishini ham qo'shimcha qildi.

«Austin Powers» to'rtinchi qismi

Intervyuda Mayers uzoq kutilgan yana bir loyihaga — «Austin Powers»ning to'rtinchi filmiga ham to'xtaldi. Jeyms Bond haqidagi filmlarni parodiya qiluvchi bu seriyaning oxirgi filmi «Austin Powers in Goldmember» 2002-yilda chiqqan. Rejissyor Jey Roach bilan birga Mayers avval ham yangi qism imkoniyatini tilga olgan edi.

Hozir Mayers ssenariy ustida ishlayotganini tasdiqladi. «Ha, yozayapman, vaqtni juda yaxshi o'tkazyapman. Men juda sir saqlayman. U maxfiy agent, shuning uchun ko'p narsa ayta olmayman», — dedi u, tafsilotlarni oshkor qilmasdan.

Shu bilan birga «Shrek 5» 2027-yil 30-iyunda kinoteatrlarda chiqadi. Filmda Shrek va Fionaning o'spirin uch o'g'lidan biri Farklni «Focker-in-Law» yulduzi Skayler Gizondo ovozlantiradi.

Manba: The Hollywood Reporter, Screen Rant