Kino yangiliklari

Feige: Downey Jr.ning Doctor Doom'i Iron Man varianti emas

14-noyabr, 2026 13:15Doctor Doom, Robert Downey Jr., Kevin Feige, Marvel, Qasoskorlar: Qiyomat kuni

Marvel Studios rahbari Kevin Feige «Qasoskorlar: Qiyomat kuni» filmidagi Doctor Doom Tony Stark'ning varianti ekanligi haqidagi nazariyalarni rad etdi. U Robert Downey Jr. ijro etayotgan qahramon mustaqil shaxs ekanini aytdi.

Collider xabar berishicha, Feige bu fikrni Empire jurnaliga bergan intervyusida bildirgan. U Doom boshqa qahramonni qaytarishning "qisqa yo'li" bo'lishi mumkinmi, degan savollarga to'xtalib, javob "yo'q" ekanini bildirdi. Uning so'zlariga ko'ra, bu qahramon — Victor Von Doom.

Bu holatni Feige Chris Evans misolida tushuntirdi: Evans Fantastik To'rtlikdagi Johnny Storm (Human Torch) rolini ijro etgan, ammo Storm Steve Rogers'ning varianti emas. Xuddi shuningdek, Downey Jr. yangi rolda ham Tony Stark'ning nusxasi bo'lmaydi.

Nega bunday nazariyalar paydo bo'ldi

Doom roliga Downey Jr. 2024-yilda tasdiqlangan. O'sha paytda Jonathan Majors'ga qo'yilgan zo'ravonlik ayblovlaridan so'ng Kang the Conqueror beshinchi «Qasoskorlar» filmining bosh dushmani bo'lmay qoldi, film nomi «Kang sulolasi»dan «Qiyomat kuni»ga (Doomsday) o'zgardi. Marvel'ning "Multiverse Saga" davri «WandaVision»dan boshlangani uchun muxlislar bu tanlovni multikoinot syujeti bilan bog'ladi.

Hammuallif rejissyor Joe Russo esa Empire'ga Doom'ni "gotik qahramon" deb ta'riflab, uni Qasoskorlar qo'rqishi kerak bo'lgan dushman deb atadi. Uning aytishicha, Doom "jahannam menga bo'ysunadi" deganda hazillashmaydi, juda kuchli, qora sehr egasi va o'ziga kerakni olish uchun jonini sotishdan ham toymaydi.

Doom'ning imkoniyatlari bilan tomoshabinlar «Qasoskorlar: Yakuniy o'yin» (Avengers: Endgame) qayta namoyishidagi va «VisionQuest» serialidagi post-kredit sahnalarda qisman tanishgan. U multikoinot bo'ylab sayohat qilib, Earth-616 qahramonlaridan Hulk (Mark Ruffalo) va Wanda Maximoff (Elizabeth Olsen)ni olib ketgan, Wanda'ni esa o'z kuchlari bilan tiriltirgan. Film chiqishiga bir oyga yaqin vaqt qolgan bo'lsa-da, syujet tafsilotlari hali sir saqlanmoqda, hozircha ikkita treyler e'lon qilingan.