Maykl Mann «Heat» ssenariysi huquqlari uchun sudlashmoqda

New Regency «Heat» (1995) ssenariysining mualliflik huquqi o'zida qolishini talab qilib, rejissyor Maykl Mannga qarshi sudga murojaat qildi. Mann tomoni esa «Heat 2» suratga olishiga bu nizo ta'sir qilmasligini ta'kidlamoqda.

Variety va Screen Rant xabar berishicha, New Regency 13-noyabr, juma kuni Kaliforniya federal sudiga da'vo arizasi topshirgan. Kompaniya 1995-yilgi «Heat» ssenariysiga bo'lgan huquq o'zida qolishini va Mannning bu huquqni qaytarib olishiga yo'l qo'yilmasligini so'ramoqda.

Nizoning mohiyati

AQSh mualliflik huquqi qonuniga ko'ra, muallif boshqa tomonga topshirgan huquqlarni 35 yildan keyin qaytarib olishi mumkin. Mannning advokatlari shu yilning boshida shunday qaytarish haqida rasmiy xabarnomalar yuborgan. New Regency esa ssenariy «yollanma ish» (work made for hire) hisoblanishini, shuning uchun bunday huquqni qaytarib bo'lmasligini aytadi.

Da'voda yozilishicha, Warner Bros. «Heat» ssenariysi huquqlarini 1994-yilda Mannning kompaniyasi bilan tuzilgan kelishuv orqali olgan. New Regency bu kelishuv huquqni topshirish emas, aynan «yollanma ish» shartnomasi bo'lgan, deb hisoblaydi. Kompaniya Mannning xabarnomalari «Heat» ustidagi egalik huquqiga soya solayotganini aytib, ularni haqiqiy emas deb topishni so'ramoqda.

Mann tomoni birinchi xabarnomada huquq 1988-yilda uning o'ziga qarashli kompaniyalarga topshirilgani aytilgan. Da'voga ko'ra, kelishuvning nusxasi so'ralganda, u og'zaki bo'lgani ma'lum qilingan. Keyingi ikki xabarnoma boshqa kelishuvlarga tayangan, New Regency ularni ham haqiqiy emas deb hisoblaydi.

Mannning vakillari bayonotida aytilishicha, ssenariy rejissyorning 1980-yillarda yozgan bir necha shaxsiy ssenariylaridan o'sib chiqqan. Ular «40 yildan keyin Maykl Mann mualliflarning o'z ijodini qaytarib olish huquqidan foydalanmoqda», deydi va da'voga qarshi qat'iy kurashishini, sud uning qonuniy huquqlarini tan olishiga ishonishini bildirdi.

«Heat 2»ga ta'siri qanday bo'ladi

Mannning vakili bu nizo «Heat 2»ni suratga olishga aloqasi yo'qligini alohida ta'kidladi: suratga olish 2027-yil 19-yanvarda boshlanadi. Variety yozishicha, loyiha avval Warner Bros.da edi, o'tgan yili studiya undan chiqib ketgan va film Amazon MGM Studios'ga o'tgan. Mann ham, New Regency ham Amazon bilan nizoni hisobga oladigan kelishuvlar tuzgan, Mann qaytarib olishi mumkin bo'lgan huquqlarni Amazon'ga topshiradi. Ya'ni nizo qanday hal bo'lmasin, «Heat 2» o'zgarishsiz qolishi kerak.

«Heat 2»da Leonardo DiCaprio va Christian Bale bosh rollarda, Adam Driver esa asosiy antagonist Otis Wardell obrazida ko'rinadi. Shuningdek, filmda Stephen Graham, Ebon Moss-Bachrach, Odessa Young va Jason Clarke ishtirok etadi. Film 1995-yilgi «Heat» uchun ham oldingi, ham keyingi voqealarni qamrab oladi.

Manba: Screen Rant, Variety