Serkis «The Batman — Part II» suratga olish qachon qayta boshlanishini aytdi

Aktyor Endi Serkis «The Batman — Part II» suratga olish ishlari Rojdestvodan keyin darhol qayta boshlanishini tasdiqladi. U filmda Alfred Pennyworth rolini ijro etadi.

Screen Rant yozishicha, Serkis hali ushbu qismda Alfred sahnalarini suratga olmagan, chunki jarayon cho'zilib ketgan. «Men bu filmda hali Alfredni o'ynamadim, chunki suratga olish ishlari uzaytirildi. Shuning uchun Rojdestvodan keyin darhol boshlaymiz», — dedi u. Aktyorning gaplarini «The Batman Saga News» sahifasi X tarmog'ida e'lon qilgan. Suratga olish ishlari 2026-yil yozida boshlangan edi. Ungacha loyiha bir necha marta tayyorgarlik bosqichida kechiktirilgan.

Rejissyor almashuvi

Rejissyor Matt Reeves oktyabr oyida suratga olish jarayonidan chetlashdi. Xabarlarga ko'ra, asosiy suratga olishni yakunlashda unga Steven Soderbergh yordam beradi. Reeves bu haqda: «Aniq aytay, men «The Batman — Part II»ni tark etmayapman. Ushbu murakkab paytda asosiy suratga olishni tugatishimga ko'maklashgani uchun Stivenga chuqur minnatdorman», — deb yozgan.

Bosh rolni ijro etayotgan Robert Pattinson ham Soderbergh qarorini iliq kutib oldi. Uning so'zlariga ko'ra, bu — Mattga beg'araz yordam, Soderbergh esa ishni Reeves bilan hamkorlikda, montaj bosqichigacha olib borishni istaydi. Pattinson stsenariyga katta mehnat sarflanganini va suratga olish yakuniga yaqinlashganini ham qo'shimcha qildi.

DC Studios hammuassisi Jeyms Gann avvalroq film baribir Reevesning asari bo'lib qolishini bildirgan edi. Biroq Skydance va Warner Bros. birlashuvidan keyin Gann va uning hamkori Piter Safran DC Studios'dan ketgan. Bu ketish Reeves loyihasiga qanday ta'sir qilishi hozircha noma'lum, lekin umumiy fikrga ko'ra, suratga olingan yoki olinayotgan loyihalar rejaga muvofiq davom etadi.

Film haqida

2022-yilda chiqqan birinchi «The Batman» filmida Robert Pattinson Bryus Ueyn/Betmen, Zoë Kravitz Selina Kayl, Paul Dano Riddler, Colin Farrell Pingvin, Jeffrey Wright esa komissar Gordon rollarini ijro etgan. Davomida Sebastian Stan, Bryan Tyree Henry va Scarlett Johansson aktyorlar tarkibiga qo'shildi. Barry Keoghan esa birinchi filmdagi qisqa epizoddan so'ng Joker sifatida ko'rinadi.

Manba: Screen Rant